إزاي تصوّر منتجاتك؟

إزاي تصوّر منتجاتك؟

عشان تطلع صور حلوة لمنتجاتك، محتاج تعمل جلسة تصوير ناجحة. ومش لازم تكون مصور محترف أو عندك استوديو تصوير خاص. تقدر تعمل جلسة تصوير بسيطة في البيت أو حتى بره باستخدام شوية أدوات

ونصايح بسيطة.

1. جهّز لجلسة التصوير

سواء عندك خبرة في التصوير أو لسه مبتدئ، النصايح دي هتفيدك:

اعمل قائمة بالصور اللي عايزها

قبل ما تبدأ، فكر في الزوايا اللي عايز تبرزها في منتجك وإزاي هتلقطها. اعمل قائمة باللقطات اللي عايز تاخدها عشان ترتب خطواتك وتعرف هتحتاج إيه.

صور مجموعة منتجات مع بعض

جلسات التصوير ممكن تاخد وقت، فلو صوّرت كذا منتج مرة واحدة هتوفر وقت. حدد اليوم، الوقت، وحالة الإضاءة عشان تعرف تكررهم لو احتجت.

جهّز كل الأدوات

جمّع كل اللي هتحتاجه حسب مكان التصوير، ممكن تحتاج:

كاميرا أو موبايل بكاميرا كويسة

سطح مستقر للتصوير عليه

إضاءة طبيعية أو صناعية

خلفية مناسبة

حامل كاميرا (ترايبود)

ولو بتصوّر حاجات صغيرة أو عايز تفاصيل دقيقة، ممكن تحتاج عدسة ماكرو.

 2. ختار الخلفية

الخلفية البسيطة بتركز على المنتج. ممكن تستخدم ورق كبير، قماش ناعم، أو حيطه لونها فاتح. لو مش عارف تختار، الأبيض أو الرمادي بيكونوا خيار حلو.

خلفية ناعمة

علّق ورق خلف المنتج وسيبه ينزل بشكل ناعم لتحت، وخلي بالك من أي تجاعيد.

الخلفية الطبيعية

لو منتجك مناسب يتصور بره، زي الشنط مثلاً، ممكن تصوّرها في مكان طبيعي زي حديقة. دي هتساعد الزبون يتخيل المنتج وهو بيستخدمه.

3. ظبّط الإضاءة

الإضاءة هي الأساس، سواء كانت من الشمس أو لمبات صناعية.

استخدام الضوء الطبيعي

لو مش عندك معدات إضاءة، ممكن تعتمد على ضوء الشمس. خلي بالك بس من الظلال القوية، وصوّر في يوم غائم أو جنب شباك فيه ضوء لطيف.

استخدام الإضاءة الصناعية

لو الإضاءة الطبيعية مش كفاية، ممكن تستخدم بوكس لايت. خلّي الإضاءة من الجوانب عشان الظلال تكون ناعمة.

4. ثبّت الكاميرا

عشان الصور تطلع واضحة، استخدم ترايبود أو أي حاجة ثابتة. ولو مش حابب تضغط بنفسك، استخدم ريموت للتحكم في الكاميرا.

5. جرب قبل ما تبدأ بجد

قبل ما تبدأ، خد شوية صور تجريبية وتأكد إن كل حاجة مظبوطة. افتح الصور على الكمبيوتر وتأكد من التفاصيل.

ودلوقتي جاهز تبدأ! شد حيلك وخلي منتجاتك تبان بأحلى صورة ممكنة!